[flash]http://static.video.qq.com/TPout.swf?vid=d1315vadn3e&auto=0&v.swf[/flash]
首先，俺爱先把全部个神明作统称入伊，将恩作叫做“老爷”，包括“妈祖”，照况叫起来就比较方便。戎［riong5］
海陆丰人喜欢拜老爷，者是古风遗传落来的，着《春秋左传》内底就有一句话，叫做“国之大事，在祀在戎”，意思就是讲，国家个大事，在于祭祀捞军事；而且着《论语》中，孔子也有讲过一句话，叫做“祭如在，祭神如神在”，意思就是讲，祭祀祖公捞神明，就好像恩就着面头前一样，爱恭恭敬敬，彬彬有礼。所以，俺海陆丰人崇尚拜老爷是一种古风个遗留。
但是，海陆丰人喜欢拜老爷，者也捞海陆丰个灾难史有关。其实俺海陆丰人到旨来也经历过好夦灾难……
而现在好夦个后生人可能作唔清楚，海陆丰个历史经历个许些故事。
俺海陆丰人安居着旨海陆丰地域寡百年个历史，者也是经历过了“湖广填四川”捞“迁界复界”个战争，就是为了躲避战争，俺个祖先正着福建辗转潮汕地区来到了海陆丰。也就是讲，俺个祖先大量进入海陆丰地区个时史是着明末清初。至今之后，正有所谓个海陆丰福佬人。
接落呢，着俺个近代，海陆丰也经历过“饥荒年”捞“文化大革命”，旨两次艰苦个年代，当时个情景是咋呢样，者也只有俺个老辈人正会知。
所以，海陆丰人经历过好夦灾难，每个人作希望能够安居乐业，希望厝中个人出去外口赚食平平安安。着旨种情况下，恩需要一种寄托，一种精神个载体，而拜神就是最好个方式。所以，海陆丰人喜欢拜神并唔是一种迷信，而是一种信仰！
